hejên

Serincdandinêkî rexneyî le pertûkokey “nîgayek le êsta û xewnêk bo sbey”î merîwan wirya, aras fetah, bextyar ‘elî, rêbîn herdî/ beşî bîstem

Çwarem: pêdaçûnewe be rollî hîzbdawek yekeyekî serekî syastkirdin

1- hîzb çî bêt û çon bêt?

Hîzb eger kollekey here serekî jyanî syasî nebêt, ewa yekêke le kolleke hereserekîyekanî. Bellam hîzb katêk debête kollekey serkî jyanî syasî ke hêzîkî çalakû karîgerbêt, dunyay xoy bnasêtû ew nasîney kirdbête bernamew plan bo wellamdanewey pêdawîstîû qeyranû çawerrwanîyekanî ew dunyaye. L61

Eger sernicî ew rêwşiwêne ke nûseran be partî debexşin, bdeyn, debînîn, ke part rollî kenîse debînêt, ke nwênerayetî xwa leser zewî dekat. Çunke bebê kenîse natwanrêt desellatî paşakan wek desellatî xwa, pîroz bikrêt. Nuseranîş bepêy hawkêşeyekî lew core û be heman pêwane part dekene kollekey paristnî desellatî çînayetî lejêr pîrozkirdnî be dêwcamey berjewendî neteweyî û nwênerayetî netewe. Bellê part kenîseyeke, ke endamanî milkeçî desellatî kemayetîyek dekat û hetayîbûn be desellatî borcwazî debexşêt. Lem ser ta ew serî dunya part herwek kenîse xoy be nwênerî rasteqîne (xwa- netewe- çîn) dadenêt û pîrozî be desellatî kemayetîyek benêwî nwênerî xwa leser zewî ya netewe û çîn le parleman û dereweyda debexşêt, bem core le serdemî pêş-modêrn û modêrn û ta post-modêrnîzmekey nûseran, efsane ayînîyekan le asmanewe bo zewî dadegêrdirên û poşakî jîranî (‘eqlanî)yan beberda dekrêt.

Bellam nûseran le dillnyanebûn le hereserekîbûnî part wek kollekey jyanî ramyarîyewe be yekêkbûn le kolleke heresekîyekanî jyanî ramyarîy degen û paşan qse le katêk deken, ke desellat debête kollekey serekî jyanî ramyarîy. Mercîşyan bo ewe çalakbûn û nasînî dunyay xoy û be plan û bernamekirdnî ew nasîne bo wellamdanewe be pêdawîstî û qeyran û çawerrwanîyekanî ew dunyayeye. Kame dunya?

Meger partekanî borcwazî kurd, be dyarîkrawî desellatdarekanyan, kollekey serekî nek tenya ewey nûseran deyixwazn, bellku mall û reşmallî koçerekanî kurdîş pêknahênin? Meger her ewey nekirduwe, ke nûseran deyixwazn; planrrêjkirdin û bernamekirdnî xudnasînî bo wellamdanewe be pêdawîstî sîstemî sermayedarî cîhanî û qeyranekanî û çawerrwanîyekanî ew dunya çînayetîye? Îtir gleyyan le çîye û partekan û desellatî borcwazî kurd kame kar û erkî raperranduwe, ke tozqallîk le berjewendî çînayetî borcwazî laydabêt û le berjewendî zorîney komellge(zorîney naborcwazî)da bûbêt û bêt? Min lewe dillnyam, ke eger xudî nûseran le brî ewaney êsta serok û şalyar bûnaye, be dillnyayyewe eger xraptiryan nekirdaye, baştiryan nedekrid, leberewey ke ewanîş xwazyarî desellat û berterî û destebjêrîy û naw û nawbangin û hîç larîyekyan le dunyay çînayetî nîye û xwazyarî “nayeksanî yasayî”n, ew kollekey serekîye ke sîstemekey ragirtuwe?

Sererray emane hîzb debêt bbête ew ellqeyekî lerrêgayewe hawllatîyan be hkumetewe grêdedat, L62

Herçende nûseran lew derbrrîneda amancêkî tiryan heye, ke xoşbawerrtirkirdnî herçî zyatrî takekan “hawullatîyan” û kemkirdnewey narrezayetîye beramber desellat le rêgey partîykirdnî xellkewe. Belam emeyan rastgoyanetrîn danpêdanane be rollî dêmagogyaney partda, ke le frîwdanî xellk le jêr nêwî “netewe”, “nîştman”, “ayîn” û “çînî krêkar”da, takekan bewe xoşbawerr dekat ke desellatî rêkixrawî dewllet û mîrî brîtîye le wîst û xwastî ewan. Be watayekî dîke part ew dêwcameye, ke behoyewe takekan bo desellatî çînayetî kemayetîyek be (ramyarî) borcwazî (ram) dekat. Part her eweye û parte borcwazîyekanî kurdîş her eweyan kirduwe û eger nûseran hêşta gleyyan lewe heye, debêt êmey jêrdest supasguzar bîn bewey nûseran daxwazîyan heyew hana bo drustkirdnî partî naben û bew core mşexorêkî dîke û tallançîyekî dîke qut nakenewe!

Hîzb le kurdistanda nwênerî komellga nîye, bellku serwerî komellgaye, benawî ewewe qse dekat, L63

Îtir lêrewe danpêdananekey nûseran be rollî leyek maregeraney part (marekirdnî çîn û twêje bindestekanî komellge le desellatî kemayetî serwer) berew çêkirdnî dûrgey “waq waq“ le hoşmendî takda mildenêt. Ewan dexwazn be bindestanî kurdistan bllên, le şwênêkî dîke her le sayey sîstemî sermayedarîda part heye, ke nwênerî serapay komellgeye û katêk ke be kursîyekanî desellat degat, nabête serwer, bellku debête xizmetkarî komellge û wek parte xewnawîyekey nûseran benêwî komellgewe qse nakat! Aya seyrusemerey wa le dunyay ketwarîda bûnî heye?

Min le xwênerî hêja deprism, aya êwe lem ser ta ew serî dunya, le partî lîbrallewe ta koneparêz, le komunîstewe ta îslamî, partêk şik deben ke serwer nebêt/ nebûbêt û xizmetgerî komellge bêt/ bûbêt? Ey qsegeranî nîolîbralîzm em sersûrrhênere kesnedîtuweyan le kwê dozîwetewe, kewa êmey “mêgel” lêy naagayn?

Komellgay ême ber le her heresêkî gewre, pêwîstî beweye zor be xêrayî lem dîktatorîyetî hîzbye derçêt, çunke em dîktatorîyete rûberrûy berengarîye komellayetîû exllaqî îcgar gewre debêtewew hîzb xoşî debête yekêk le qurbanîye gewrekanî. L63

Lewêwe ke nûseran her le seretawe dekewne hewllî perdepoşkirdnî hokarî serekî nayeksanî û nadadwerî komellayetî, eweş dekene pêplîkaney serkewtin berew encamdanî karî dwatir, ke xoşbawerrkirdnî xellke be desellatî baş û dwacar geyîştin be desellatî başîş pêwîstî be kokirdnewey hemuwane le dewrî destebjêrêkî jîr û xwêndewar, ke amrazêkî pêwîste û ew amrazeş ta henûke le paş kemrrengibûnewey rollî perestgekan û konbûnî poşakî pyawixwadîy desellatdaran, tenya twanîwyetî partêkî ramyar bêt û be rast û çepî partewe çend sedeye le paş her bazdanêkî tak berew huşyarbûnewe û derbazbûn le dawekanî endametî part, destebjêrekanî serûy part, xewnî partêkî trî serû helle dekene torî gêrranewe û rawkirdnî take yaxîbuwekan. Paş ewey ke destî ramyaran û seranî part derdekewêt, îtir rollî nûseran û roşnibîranî wirdegîr derdekewêt û xoşbawerrkirdnî tak bewey ke desellat detwanêt baş bêt û part dekrêt nwênerî berjewendî komellge û kollekey serekî jyan bêt, debête erkî serekîyan!

Eger eme prrupagendey wirdeborcwazî desellatixwaz û hawixwanî desellatdaran nebît, ewa tênegeyîştin û keçbînînî rûy rasteqîney desellat û rollî parte le kopîkirdnewe û komellayetîkirdnewey serwerîda. Bellam nûseran zor baş bo ewe çûn, ke ewe twanay cadûgeraney parte twanîwyetî wek peristgekan tak milkeçî mîrayetî kesanêkî dîke bkat.

Nûseran wek xemxorî part dên û seranî part agadar dekenewe, ha eger dîktatorî partekan nekene dîktatorî mîrî, ewa bem zuwane camî rqî xellkî pirrdebêt û berengarî komellayetî rûberrûtan debêtewe û bexoştan debne qurbanî “qurbanî!!!“. Bellam eger destêk be arayîşî rêkxistin û çonyetî berrêwebirdnî komellge û cllew bo kesanî dîke şil bkenewe, bedillnyayyewe detwanin bo serdemêkî dûrudrêjtir qurbanîyekanî rollî part û serwermanewey çînêk, ke part amrazî le desellatmaneweydaye, koyle û nahuşyar rabgrin.

Meger her ew hoye nîye, ke xemxorî nûseran bo parastinî partekan le mirdin, naçar be amojgarîkirdnî ewaneyan dekat, ke zor car be dêwezme nêwyan birdûn?

2- hîzbe bçûkekan le nêwan lall bûnî syasî û bêxewnîû bêprrojeyî komellayetîda L 64

Lêreda nagerrêmewe ser lêdwan leser opozsyonbûnî part û layenekanî tir, ya qorixkirdnî meydaneke tenya bo dû part. Çunke le nzîkey tewawî dunyada herwaye, ke hêze gewrekan, hêze giçkekan kenaregîr deken. Le emerîkaş herwaye û komarî û dêmokrat wek (înk) û (pidk) parleman û mîrayetî qorx deken. Hawkat ewe dû hokarn, ke layen ya parte giçkekan dehênne meydan:

Yekem, xoşbawerrî takî dengeder bewey ew giçkane detwanin baştirbin, ewey ke nûseran xerîkin ballîkî cyawebû (kompanyay wşe) le partî dayk (înk) bkene opozsyon û xellkî pê xoşbawerr bken.

Duwem, hellkewt û pêdawîstî ramyarîy û abûrîy sîsteme cîhanîyeke le nawçekeda, ke ta henûke rûberrûy metrisîyekî weha nebuwetewe, taweku naçar be rollbexşîn bew partane bêt. Egerçî le nawçeyekî bçûk ya şarêkda eme rûyda ya rû dedat, bellam begşitî hêşta metrisî xinkêner serîhellnedawe. Bo nmûne eger le ‘îraqda krêkaranî newt serbexo xoyan rêkbxen û wek ellternatîvî xoteqandnewey îslamîyekan, mangirtnî giştî û ktupirr û drêjmawe û sertaserî rabgeyênin, eger rîzî yekgirtûy cutyaran û xwêndkaran û fermanberan û xanenşînan û kemendaman û awarekan le bzave komellayetîye serbexokanda rojane şeqamî şarekan dagîr bken, ewa hem parte desellatdarekan dekewne xo û dest le hendêk şit helldegrin û hem parte giçkekanîş dekewne xo û hem kompanîye cîhanlûşekan û serleşkrekanî dagîrger naçar be kşanewe debin û hem deste têrorîste îslamîyekan û dewlletîyekan naçar be girtneberî şêwazî dîke debin, be watayekî dîke lewaneye baştirîn nmûne ewe bêt, ke pirsyar le xudî nûseran bikrêt; boç le (10 , 12 , 14 , 16 , 18) sallî raburdûda êwe aweztan be darriştnî weha manîfêstêk neşka? Wellamekeş zor aşkraye, çunke desellat beqed êsta le metrisî hellgerranewey xellkîda nebû û metrisî bênrixbûnî part û netewepersitî le sallanî raburdûda wek êsta nebû. Bellam hemû em hewlle bêjnigîyane natwanin berî xorî hoşyarbûnewey takî kurd bigrin, le ewrupa û emerîka û ustralya le dllî dêmokrasîye borcwazîyekey nûseranda, wêrray ew rîforme xwastrawey ewan, keçî roj berroj jmarey naumêdan le part û beagahatuwan le çînayetîbûnî desellat û nokerî yasa û serwerî bo sermaye le zyadbûndaye û rîzî dengderan le kurtibûnewedaye!

Dûbare binyatnanewey çemkî “opozsyon bûn” lenaw syasetda, be manay bûnî îradey gorranî rîşeyîû rêkixrawu bernamekarî modêrnû dîmukrasîû xewnî binyatnanî komellgayekî dadperwerane. Li 68

Eger waz le wajekanî wîstî gorranî rîşeyî û binyatnanî komellgey dadperwer bhênîn, ke bêcge le dêwcameyek bo şardnewey xwastekanî wirdeburcwazî bo rîform û beşdarî desellat ştêkî dîke nîn, ewa ewende bese bllêyn, eger bêdengî çîn û twêje komellayetîye bindestekan, be çollewanî biçwênîn, ewa desellatî cêgîr bo frrîn û xorrizgarkirdin pêwîstî be ballgirtin nîye. Bellam katêk ke takekanî komellge le xew û bêdengî radeçlekên, îtir parte desellatdarekan pêwîstyan be frrîne bo şwênîk, ke destî turreyî cemawerîyan pê negat, bo eweş ballderkirdin pêwîste û opozsyon ballî duwemî ew dallekerxoreye, ke 18 salle leser xwan û jyanî xellkî delewerrêt. Opozsyon û rollpeydakirdnî beçke partekan lewedaye û bo ewe serhelldedat, ke swarî şepolî narrezayetî xellk bbêt û le xiştey berêt, herwek lîstî kompanyay wşe be hellgirtnî nêwî “goran” pêyhesta, ke bernamenûsekanî roşnibîranî le corî nûseranî “nîgayek le êsta û xewnêk bo sbey”ni û em namîlkeyeş her bo ew mebeste nûsrawe.

Ezmûnekanî mêjû eweman nîşan deden, ke desellatdaran le hemû qonaxekanî serwerî û sîstemekanîda, be agir û asn û zîndan û sêdare hewllyandawe û deden ber be wîstî gorranî rîşeyî, ke hellgêrranewey komellgey çînayetîye, bigrin. Herweha komellgey dadperwer tenya katêk bûnî debêt ya deebête ketwar, ke le serûy endamanî komellgewe kes serwer nebêt û ştêk benêwî dewllet û berjewendî neteweyî û xwa û nîştman nebêt. Katêk ke hemuwan azad û hemuwan yeksan û hemuwan behremend le dadperwerî komellayetî, dadperwerîyek, ke mêjû selmandûyetî bebê azadî yekcarî le berrêweberayetî çînayetî û yeksanî hemû endamanî komellge le maf û erk û berhem û dahat û samanî komelge, bûnî esteme. Allugorrêkî rîşeyî awa, pêwîstî be şorrşî komelayetî heyew şorrşî komellayetîş bebê lêdan le paye abûrîyekanî destemoyî û nayeksanî û nadadwerî komellayetî û lenawbirdnî pêkhatey serwerî çînayetî le gişt şêwekanîda, xêzanî -xêllekî – partîy – dewlletî, hatne dî û meyserbûnî esteme! Aya gorrînî fllane sertîp be fllane ekadêmîst, gorrînî pidk be kompanyay wşe, mela be qeşe, polîs be pêşmerge, ‘egal be camedanî, gorranî rîşeyî drust dekat?

 

Bo xwêndnewey beşekanî tir klîkî êre bke